A conserveira boirense JEALSA comezou o ano facendo balance dos fitos recentes pola empresa en materia de sustentabilidade e coidado do medio natural. Segundo fixo saber, no período comprendido entre outubro de 2018 e setembro de 2019, máis da metade do atún procesado pola conserveira (exactamente o 54%) foi capturado por barcos participantes en rigorosos proxectos de mellora das pesqueiras (proxectos FIP) nas que desenvolve o seu labor (47% FIP grao A e 7% FIP grao C). Estes e outros datos figuran na relación de compras de atún no devandito período achegada por JEALSA, seguindo coa súa política de transparencia e de compromiso coa economía racional e renovábel.
Neste balance tamén se dá a coñecer que o 5% de todo o atún elaborado pola conserveira con sede en Bodión conta coa certificación MSC, que é, nas súas palabras, o estándar de sustentabilidade máis recoñecido a nivel mundial.
O informe tamén inclúe unha relación dos provedores e as porcentaxes de actividade xerada polos mesmos en relación a JEALSA: o 26% dos subministradores foron empresas participantes na alianza ISSF (International Seafood Sustainability Foundation), o 12% Data Check Companies, (empresas que sen ser membros de pleno dereito de ISSF, cumpren con todos os requisitos de auditoría esixidos por esta organización) e o 24% procede directamente de frotas armadoras.
