Encontro entre o rexedor de Boiro e a conselleira do Mar para abordar cuestións relativas ao municipio

Na tarde de onte produciuse unha xuntanza de traballo entre o alcalde de Boiro, José Ramón Romero, e a conselleira do Mar, Rosa Quintana, acompañados do edil de Emprego e Industria, Marcos Fajardo, e a directora xeral de Desenvolvemento Pesqueiro, Susana Rodríguez. O obxectivo deste encontro radicaba en trazas liñas de colaboración e proxectos comúns entre ambas Administracións.

O mandatario local presentoulle á titular de Mar unha serie de propostas que se queren levar a cabo no municipio, tanto a curto coma a longo prazo, e que se poden implantar coa cooperación entre Concello e Xunta de Galicia.

Outro dos temas a abordar foi o do furtivismo. O rexedor trasladou a preocupación da veciñanza no que respecta a esta problemática. Pola súa parte, Rosa Quintana explicou cales son os medios e mecanismos dos que dispón a Consellería para actuar neste senso.

Así mesmo, falaron sobre a oferta formativa na localidade. En canto a isto, o alcalde expresou o interese por potenciar a relacionada cos sectores produtivos do mar, tales coma a acuicultura e o marisqueo, contribuíndo así á súa profesionalización e mellora da empregabilidade.