O alumnado do obradoiro de emprego Hostalería Boiro III organiza para o venres 28 un evento gastronómico con motivo do Entroido. Así, o local multiusos do mercado municipal acollerá unha degustación de doces típicos destas datas, a partir das 11.00 horas.
Esta actividade enmárcase no programa do referido taller que o alumnado realiza no centro de formación e viveiro de empresas situado no polígono industrial de Espiñeira, recibindo unha formación dual que une teoría e práctica.
O obradoiro de emprego Hostalaría Boiro III comezou no mes de outubro e conta coa participación de 16 persoas, 8 na especialidade de Operacións Básicas de Cociña e outras 8 na de Operacións Básicas de Restaurante Bar. Ademais, este curso atópase cofinanciado pola Iniciativa de Emprego Xuvenil e o Fondo Social Europeo (FSE), sendo promovido polo Concello boirense.
