O tramo viario comprendido entre as rotondas de Amas de Casa e de Padín, ambas situadas na fachada marítima de Ribeira, está sendo obxecto desde esta mesma mañá dos labores de pavimentación.
Esta actuación está financiada por Portos de Galicia en virtude do convenio subscrito o pasado 6 de novembro entre a súa presidenta, Susana Lenguas, e o alcalde de Ribeira, Manuel Ruiz.
Desde o Concello manifestan que, coa recente remodelación do paseo do Malecón e este asfaltado, tan só quedará a proxectada reforma do paseo das Carolinas, a cal inclúe tamén a pavimentación do parque García Bayón, do que xa se renovou o seu parque infantil. Deste xeito, completarase a renovación integral da fachada marítima. A este respecto, cómpre lembrar que, en relación á obras das Carolinas, estase á espera da súa adxudicación definitiva.
