
Este venres 14 de febreiro celebrouse en Ribeira, no Restaurante Baiuca de Artes, a xornada de presentación de EduDiversa, o programa de apoio e asesoramento para a comunidade educativa dirixido a fomentar educación inclusiva e atención á diversidade. Segundo fixo saber a Asociación AMBAR durante a presentación, EduDiversa é unha iniciativa baseada “no modelo de Dereitos Humanos” que inclúe formación de balde, asesoramento e recursos para adaptar os espazos docentes cara o derrube de barreiras. Na cita participaron medio cento de docentes da nosa contorna. O programa EduDiversa está co-financiado pola Fundación La Caixa.

No transcurso da convocatoria deste venres debulláronse os desafíos cos que se atopa hoxe en día a educación ordinaria e como podemos traballar por “unha educación de calidade introducindo metodoloxías e ferramentas innovadoras”. Presentáronse tamén as diferentes accións que se levarán a cabo durante a duración do programa EduDiversa: formación en atención á diversidade para o profesorado da comarca e asesoramento específico para mellorar o apoio á diversidade en aula.
Ademais dos centros educativos da comarca, na xornada de estiveron presentes a xefa do Servizo de Inclusión e orientación Educativa, Natividad Bouzas; o alcalde de Rianxo, Adolfo Muíños; as concelleiras de Educación e Servizos Sociais de Ribeira, Juana Brión e Ana Ruiz e a concelleira de Servizos Sociais de Porto do Son, Magdalena Pérez.
Milagros Rey, presidenta de AMBAR, comezou o acto agradecendo a asistencia da comunidade educativa, implicada no programa dende os seus inicios, e deu paso a Laura Sieira, mestra da asociación, que introduciu a xornada desta maneira: “Hoxe en día atopámonos cunha sociedade cambiante, na que a atención á diversidade debérase entender como algo integral, e que necesita ser abordada dende diferentes perspectivas, para crear sociedades 100% inclusivas”.

Pola súa banda, María Gómez, psicopedagoga da asociación, salientou “a necesidade de traballar nas aulas a través de diferentes metodoloxías innovadoras como por exemplo o Mobile Learning ou a Gamificación”, que son xeitos de aplicar no ensino real, eficazmente, metodoloxías propias do lecer dixital. Segundo lembrou, estes métodos están á orde do día en AMBAR, onde axudan “a dar resposta á diversidade presente na aula e a implicar máis ó alumnado como suxeito activo do proceso de ensino-aprendizaxe”.
Pechou a presentación Natividad Bouzas, xefa do Servizo de inclusión e orientación educativa da Consellería de Educación, Universidade e Formación Profesional, que falou da relevancia de programas coma EduDiversa para “reforzar a atención á diversidade e inclusión educativa”. Salientou tamén os beneficios de tirar abaixo barreiras a través da colaboración das entidades en prol da diversidade, “establecendo alianzas e unindo forzas para obter unha resposta máis axeitada á atención á diversidade”.