A Escola de Música de Rianxo afronta a recta final do inverno con dúas relevantes actividades, unha delas de vertente formativa e outra musical e conmemorativa. Respecto da primeira, trátase dun Obradoiro Musical para crianzas de catro e cinco anos e cuxo prazo de inscrición remata este 26 de febreiro.
O taller desenvolverase entre marzo e xuño todos os venres con horario de 17.00 a 18.00 horas, no Cuartel Vello de Rianxo. O prezo é de 25 euros. As persoas interesadas en asistir ao obradoiro poden solicitar información ou realizar a inscrición a través do teléfono 671 058 555 ou da conta de correo escolademusicaderianxo@gmail.com.
Respecto da outra actividade prevista, trátase dun concerto convocado para celebrar o Día da Muller Traballadora. No recital participarán diversas agrupacións (ensembles) da Escola de Música de Rianxo. A cita será o sábado 7 de marzo ás 19.00 horas no Auditorio Municipal, véspera da dita conmemoración mundial (oficialmente o 8 de marzo). Tanto unha actividade como a outra veñen da man da Escola de Música en colaboración co Concello, contando co apoio económico da Deputación da Coruña.
