O actor e escritor Ricardo de Barreiro (Merelle, Lousame, 1974) anda estes días na súa terra facendo unha homenaxe á poesía en si mesma e a todas as expresións artísticas que poden ser combinadas felizmente coa escrita. Primeiro na Biblioteca de Rianxo (o día 24), logo na Casa da Cultura de Outes (o 25) e agora, este venres, no Centro Social de Boiro (o 31 de xaneiro).
O fío temático da xira por estes concellos é a presentación da A+A, unha performance poética que é unha viaxe en dúas etapas: comeza sendo a presentación dun audiolibro para internarse de cheo nas páxinas do mesmo.
Máis en detalle, a intervención A+A narra a historia de “dous peixiños autodidactas aprendendo a amar, dous seres anónimos que deciden contar a súa propia historia anónima de amor”. A sesión,un espectáculo-viaxe para público adulto, ten unha duración aproximada de unha hora e quince minutos, e artéllase como dixemos en dúas partes: unha primeira parte na que, “de xeito informal e distendido”, se explica o porqué e o como se fixo este audio-caderno de artista, e unha segunda parte na que, despois de apagar todas as luces do espazo, faise unha lectura dos poemas de A+A dun xeito “intimista e emocionante”.