Ricardo de Barreiro estará en Rianxo, Outes e Boiro coa súa performance A+A

O actor e escritor barbanzán Ricardo de Barreiro (naceu en Merelle, no concello de Lousame, no 1974) andará este mes moi preto da súa terra de orixe para presentar o seu poemario A+A, que será dado a coñecer nun triángulo xeográfico cuxas puntas están constituídas pola Biblioteca de Rianxo (o día 24 deste mesmo mes), a Casa da Cultura de Outes (o 25) e o Centro Social de Boiro (o 31 de xaneiro). Todas as citas serán ás 20.30 horas agás a de Outes, que está prevista para as 20.00 horas. Segundo fai saber o artista na súa web, A+A é unha performance-viaxe pola marea “máis suxestiva e bravía”. Ou sexa, polo amor.

A experiencia, na que xa teñen participado arredor de 900 mariñeiras e mariñeiros da poesía (o entregado público dos seus espectáculos), narra a historia de “dous peixiños autodidactas aprendendo a amar, dous seres anónimos que deciden contar a súa propia historia anónima de amor”. A performance-presentación, un espectáculo-viaxe para público adulto, ten unha duración aproximada de unha hora e quince minutos, e artéllase en dúas partes: unha primeira parte na que, “de xeito informal e distendido”, se explica o porqué e o como se fixo este audio-caderno de artista, e unha segunda parte na que, despois de apagar todas as luces do espazo, faise unha lectura dos poemas de A+A dun xeito “intimista e emocionante”.