Os obradoiros Raposiñas Cerámica Feita de Vagar (A Pobra do Caramiñal) e Wooding (Boiro) están entre os integrantes da embaixada galega que participa no prestixioso encontro de decoración Formex, que se celebra estes días en Estocolmo (Suecia). Na experiencia, impulsada pola Fundación Artesanía de Galicia, concorren medio cento de profesionais do sector galego, mostrando as súas destacadas creacións (cerámica e bonecas de trapo, coma no caso de Raposiñas e Wooding, aínda que tamén hai téxtil, porcelana, papel, vidro, pezas de coiro, olería, ilustración ou xoguetes de madeira) nun mercado tan puxante como o nórdico, historicamente un referente do interiorismo, o deseño, a artesanía e a decoración.
A presenza da fundación na capital sueca é unha tradición que se remonta a 2013. Desta volta, a proposta dos obradoiros integrantes da expedición galega pon o foco na “creación de ambientes baseados no produto artesán e nos que a artesanía tradicional combínase con produtos contemporáneos”.
Na cita, que se celebra até o 17 de xaneiro, Raposiñas está a facer gala das súas importantes contribucións en cerámica, un ámbito creativo onde apostan polo sustentábel, o sensitivo e a constante busca do punto onde mellor se entenden os polos opostos: o moderno e a tradición, o útil e o decorativo. O equipo de Raposiñas, un obradoiro cerámico rural situado na aldea Lomba da Pobra do Caramiñal e que se adscribe a Artesanía de Galicia, está formado por Loaira Pérez, Martiño Hortas, Abelardo P. Santiago e Ismael Pérez.
Polo que se refire a Wooding, é unha plataforma boirense de artistas que elaboran bonecos personalizados. Puidemos coñecer parte do seu interesante traballo na Factoría das Raíñas (o mercado artesanal de Boiro) que abriu as súas portas na localidade o pasado Nadal.