A pesar da chuvia e como veñen facendo cada mes desde hai 6 anos, a Plataforma de Emigrantes Retornados do Barbanza congregouse esta mañá diante da delegación de Facenda de Ribeira, para despois manifestarse polas rúas da cidade ata a praza do Concello.
O voceiro da plataforma, Xosé Deira, apuntou que actualmente teñen “moitas esperanzas” en que o Goberno central lle dea solución ás súas reivindicacións. Neste senso, referiuse ao acordo asinado entre o BNG e PSOE; ademais de que a actual ministra de Traballo, Yolanda Díaz, lles comunicara o seu apoio nun encontro celebrado en Ferrol pouco antes de Nadal, polo que agardan que este respaldo se materialice, pero que mentres isto non suceda, continuarán manifestándose.
Tamén sinalou que, desde o sistema xurídico, están tendo tódolos meses sentencias a favor dos retornados, especialmente, dos de Alemaña, así como recoñecéndoselle a minusvalía a algúns dos emigrantes, pero “a desgraza é que hai que ir mediante os avogados e pola vía xurídica.”
Así mesmo, anunciou que este sábado manterán en Vilagarcía unha reunión para trasladarlle as súas demandas a Néstor Rego, deputado do BNG no Congreso; Ana Miranda, voceira do Bloque en Europa; e Monste Prado, parlamentaria da formación nacionalista.
Na plataforma intégranse ao redor de 300 afectados de Ribeira, A Pobra do Caramiñal, Boiro e Rianxo; aos que hai que sumar os compoñentes da existente na área Muros-Noia, composta por un mínimo de 150 persoas, segundo precisou o seu representante, Juan Patiño.
