A dirección do Museo do Gravado de Artes (Ribeira) vén de informar da ampliación até o 22 de febreiro do prazo para visitar dúas exposicións: por unha banda a Homenaxe aos gravadores galegos: Luís Seoane(mostra centrada na figura do pintor, gravador, poeta e intelectual Luís Seoane e que se incardina dentro da iniciativa impulsada pola Fundación Museo de Artes para exaltar aos grandes gravadores da nosa terra) e pola outraToulouse-Lautrec: Elles (1890) – Litografías (1893-1900), formada por 36 obras litográficas do inmortal artista francés do post-impresionismo.
Así mesmo, a dirección comunica que durante os días venres 24, sábado 25 e domingo 26 de xaneiro o Museo do Gravado de Artes (Ribeira) vai realizar o segundo curso O Gravado V33, impartido novamente polo catedrático da Universidade de Salamanca, José Fuentes Esteve e polo artista Antonio Navarro.
Ao fío desta actividade formativa, o obxectivo do Museo é sentar os alicerces para conmemorar o 140 aniversario da publicación do libro de poemas Aires da miña terra, realizar unha exposición e editar un volume ilustrado desta obra inmortal da nosa literatura, primeiro libro dun dos grandes poetas do Rexurdimento, Manuel Curros Enríquez. Os participantes deste segundo curso colaborarán na exposición e na ilustración do volume coas obras realizadas no taller de gravado, así como fixeron os participantes do primeiro obradoiro V33. Este segundo curso realizarase os días 24, 25 e 26 de xaneiro de 2020 no seguinte horario:
Venres, 24 de xaneiro 2020: de 16.00 a 20.00 h
Sábado, 25 de xaneiro 2020: de 10.00 a 14.00 h. e de 16.00 a 20.00 h
Domingo, 26 de xaneiro de 2020: de 10.00 a 14.00 h
Entrega de diplomas
O domingo, día 26 de xaneiro, ás 14.00 horas entregaranse os diplomas deste curso e poderán verse as obras realizadas. Os diplomas serán entregados polo presidente da Fundación Museo de Artes do Gravado e alcalde de Ribeira, Manuel Ruíz Rivas.
