Numerosas persoas achegáronse na tarde do venres ata o Museo do Gravado de Artes para presenciar a inauguración dunha exposición centrada na figura do pintor, gravador, poeta e intelectual Luís Seoane e que se incardina dentro da iniciativa impulsada pola Fundación Museo de Artes para exaltar aos grandes gravadores galegos.
A exposición amosa máis de 150 obras do artista galego de tódalas épocas. Tamén se inclúe unha mostra bibliográfica con volumes ilustrados por Seoane, ademais de pezas únicas realizadas en técnicas experimentais e matrices xilográficas orixinais. Esta exposición é posible grazas aos fondos do Museo do Gravado e a cesións temporais de coleccionistas particulares.
O acto contou coa presenza de personalidades da cultura tales coma Carlos L. Bernárdez, crítico de artes e comisario da exposición; Xabier Díaz de Castro ou Soledad Penalta, ambos membros da Real Academia Galega de Belas Artes. Xunto a eles, Pastor Rodríguez, director do Museo do Gravado; e Javier Expósito e Manuel Ruiz, vicepresidente e presidente da Fundación Museo de Artes.
