O grupo municipal do BNG de Boiro levará a pleno a situación dos areais do concello, instando ao goberno municipal a que proceda a elaborar un plan de vixilancia e limpeza do litoral boirense que non se limite e/ou circunscriba a momentos concretos do ano, ademais de buscar unha maior implicación da cidadanía no respecto á natureza coa colaboración, no posible, daquelas entidades que teñen unha especial vinculación co mar. Tamén solicita a colocación de sinais informativas sobre a importancia de manter en condicións os areais, “con mención expresa ás infraccións e sancións posibles para quen non actúe con respecto ao medio.”
A formación manifesta que o municipio conta con numerosas praias ao longo de todo o seu litoral, comportando espazos de lecer e unha fonte de riqueza para os traballadores e traballadoras do mar. Neste senso, expoñen que “é práctica habitual, ou cando menos así viña sendo desde hai tempo” a limpeza e acondicionamento dos areais durante o período estival e en datas próximas ao mesmo, “por considerar que é nestes momentos onde se fai un maior uso dos mesmos.”
Desde o Bloque local entenden que os espazos públicos municipais “deben estar, sobre todo e en primeiro termo, a disposición das veciñas e veciños en óptimas condicións, non podendo ser o turismo o primeiro, ou único, elemento que condicione a actuación municipal sobre os mesmos.”
Así mesmo, sinalan que veñen de comprobar que as praias “non contan neste momento do ano cun estado de limpeza óptimo”, precisando que distintos colectivos e veciñanza estiveron desenvolvendo accións de recollida de residuos cunha tripla intención: visibilizar o seu compromiso co medio ambiente; amosar o estado que por obra do ser humano presentan algúns espazos naturais; e levar a cabo unha limpeza que permita o desfrute destas áreas durante todo o ano. Os nacionalistas engaden que en pequenos recunchos do litoral, tales coma Neixón, hai xente que deposita residuos da construción e escombro, entre outros.
