A Asociación Boirense de Empresarios comezou 2020 seguindo a senda da formación avanzada e a innovación ao servizo dos seus integrantes. Nesta liña sitúase a clase maxistral sobre optimización empresarial prevista para a vindeira semana, o xoves 30 de 9.00 a 10.30 horas, na sede da entidade boirense. A persoa encargada de impartir a masterclass será Juan Magariños, experto en metodoloxías para gañarmos en competitividade, rendibilidade, eficiencia, rendibilidade e xestión.
A cita enmárcase no ciclo de Almorzos empresariais da ABE. Centrarase principalmente en mostrar recursos prácticos e doados de aplicar para a planificación da nosa empresa no vieiro da máxima produtividade. Magariños tamén se centrará en amosar os mellores métodos para xestionar o noso tempo, extraéndolle o máximo rendemento ao noso horario laboral.
Nun ámbito máis concretos, na masterclass avaliaranse os seguintes puntos: os hábitos de éxito que utilizan menos do 5 % das persoas que logran resultados excepcionais nos seus negocios; as diversas solucións ao dispor do noso equipo de traballo para facer que o noso negocio ascenda ao seguinte nivel (“ingresar máis empregando menos recursos é posíbel”, avanza Magariños); e as metodoloxías aplicábeis que solucionan a falta de tempo e organización.
Juan Magariños é director e fundador de Optimiza Tu Negocio. É enxeñeiro con mestrado en Coaching Internacional e Posgrao en Dirección e Xestión en Recursos Humanos (RRHH). Dende 2013 asesora e forma a emprendedores, PEME e autónomos no seu desenvolvemento de negocio. Ten na súa bagaxe máis de 1.000 horas certificadas de asesoramento e seguimento profesional a empresas.
Segundo lembra a ABE, as prazas para acudir á sesión con Magariños son limitadas e asígnanse por orde de reserva a través do correo info@abe.gal.
