Cine e espectáculo durante a fin de semana pobrense

Con motivo da programación cultural que se desenvolverá na Pobra do Caramiñal ao longo do mes de febreiro, antes de dar a benvida ao Entroido, esta fin de semana ofértase no Elma un espectáculo dirixido a público infantil e familiar, así como o visionado dun filme.

Así, o sábado 1, Boriska presenta Sueño infantil, ás 18.00 horas. Trátase dun show diferente, divertido e familiar onde se mesturan a música, o humor e o xogo. Pompas de xabón xigantes, cómicos, bailes e moito máis farán as delicias das crianzas e das súas familias.

Por outra banda, o domingo 2 terá lugar a proxección da nomeada e galardoada longametraxe O que arde, dirixida por Óliver Laxe e que ten como protagonistas principais a Amador Arias e Benedicta Sánchez. A sinopse desta cinta expón que ninguén agarda a Amador cando sae da cadea tras cumprir condena por ter provocado un incendio. Regresa á súa casa, unha aldea perdida das montañas lucenses, onde volverá convivir coa súa nai Benedicta, a súa cadela Luna e as súas tres vacas. As súas vidas transcorren ao ritmo sosegado da natureza, ata que todo cambia cando o lume violento arrasa a zona. Debido ao volume de interesados, desenvolveranse dúas funcións: a primeira, ás 19.00 horas, e a segunda, ás 21.15 horas. Os asistentes poderán recoller ata media hora antes de cada función as entradas, as cales son de carácter gratuíto.