Continúan esta semana as actividades conmemorativas do 70 cabodano do falecemento de Alfonso Daniel Rodríguez Castelao, o célebre escritor, debuxante, intelectual e político rianxeiro. O Concello de Rianxo, logo das variadas e complementarias accións dos días pasados (a performance poética de Ricardo de Barreiro ou a proxección da curtametraxe O Castelo da Lúa), co-organizará este venres 31, na Sala Arcos Moldes do Auditorio, unha dupla estrea literaria: a presentación do número 151 de A Voz de Barbantia e (tamén) a recalada en Rianxo da novela Escribirme, de Héctor Pose Porto (Malpica, 1964) e publicada por Edicións do Peirao.
Trátase esta última dunha novela semi-biográfica que, partindo dunha lembranza da mocidade do autor, remata levándonos da man cara ao terreo da reflexión persoal e das implicacións, dificultades e satisfaccións que implica a palabra que dá titulo ao libro. Ou sexa, o oficio de escribir.
O acto comezará ás 20.30 horas e contará coa intervención artística do pintor e gravador Manuel Ayaso. A apertura e o peche musical correrá a cargo do cuarteto de frautas Leliñas, da EMR.
Amais destas actividades, o Concello lembra tamén que até o 1 de febreiro está aberta no Auditorio local a exposición Sempre en Galiza: homenaxe de artistas galegos. Trátase dunha escolma de obras destacadas cedidas polo Museo do Gravado e Estampa Dixital de Artes, en Ribeira. A colectiva é un conxunto de salientábeis contribucións pasadas e presentes ás homenaxes a Castelao, da autoría de grandes artistas contemporáneos da nosa terra, todas e todos con recoñecidas e influentes traxectorias de prestixio: Antonio Murado, Berta Cáccamo, Antón Patiño, Menchu Lamas, Xosé Freixanes, Correa Corredoira, Manuel Moldes, Vidal Souto, Quintana Martelo, Alfonso Costa, Manuel Facal, Silverio Rivas, Alberto Datas, Felipe Criado. Virxilio e Leopoldo Nóvoa.
Máis cousas en febreiro
Iniciando o mes de febreiro, o sábado 1, os actos concentraranse en varios emprazamentos. En primeiro lugar, ás 12.00 horas, o busto de Castelao e as rúas de Rianxo vivirán a ofrenda floral, intervención das autoridades e saída dun roteiro. Xa pola tarde, ás 20.00 horas, o salón de actos do Auditorio acollerá a presentación do libro Desvelando a Ademar Escambia, editado por Toxosoutos e co que José Carou Rey gañou a décimo oitava edición do certame literario Antón Avilés de Taramancos. Tamén asistirán o escritor Agustín Agra; Clodio González Pérez, de Editorial Toxosoutos; e o alcalde de Rianxo, Adolfo Muíños.
