O Parque Nacional Marítimo-Terrestre das Illas Atlánticas de Galicia, o Parque Natural de Corrubedo e outros espazos de gran valor ambiental e paisaxístico da nosa terra están xa en FITUR, a referencial feira de turismo de Madrid, mostrando os seus importantes tesouros. Entre as persoas encargadas de dalos a coñecer atópase a conselleira de Medio Ambiente, Ángeles Vázquez, que enxalzou o incalculábel valor das seis reservas da biosfera de Galicia (que “malia representar a cuarta parte do territorio galego son algo menos coñecidas que outros destinos”, dixo) e os parques naturais como recurso de turismo respectuoso coa conservación do medio natural.
Durante a sesión inaugural de FITUR en Madrid, celebrada este mércores 22, a conselleira visitou o stand de Galicia e fixo unha presentación na que incidiu na necesidade de “apostar polo turismo verde” xa que, segundo dixo, “un 42,5% das persoas que visitan Galicia fano atraídas pola nosa natureza, cultura e paisaxe”.
Entre as múltiples opcións turísticas ligadas a eses valores naturais, Vázquez Mejuto citou o Parque Nacional Marítimo-Terrestre das Illas Atlánticas de Galicia, o único declarado na Comunidade, ou os seis parques naturais, entre os que se conta o de Corrubedo e o complexo lacustre de Carregal e Vixán.
A titular de Medio Ambiente rematou a súa intervención apelando ao “gran escaparate internacional que supón FITUR” e subliñou a riqueza dos territorios da nosa Comunidade, convidando aos asistentes a “visitar Galicia” e gozar da “súa ampla e variada oferta turística”.
