A Conta Xeral 2018 de Rianxo foi levada a pleno extraordinario na tarde de onte. Segundo explicou o concelleiro de Facenda, Tobías Betanzos, o documento foi elaborado polos servizos de intervención para, posteriormente, ser posta a disposición desde a Alcaldía, vista pola comisión especial de Contas e exposta a público. O edil apuntou que foi “un indicador importante do período que estivo marcado por decisións importantes e ambiciosas, no sentido de atender demandas importantes e moi sentidas. E iso foi posible por unha situación económica que facilitou emprender eses obxectivos tan ambiciosos.” Razón pola cal avogou por continuar cunha “xestión económica útil.”
A representante de Ciudadanos, Sara Resúa, indicou que o seu voto favorable se fundamentaría en que “debido ao importante atraso, pode supoñer a non concesión de varias subvencións e creo que non estamos agora mesmo para perder nada.”
O voceiro de Rianxo en Común, Julián Bustelo, manifestou que as cifras e partidas que se recollen na Conta “difiren un pouco da proposta de orzamentos para o 2019.” Engadiu que “pon de manifesto unha serie de problemas que vimos arrastrando nos últimos anos e que, paradoxicamente, semella que se agravaron desde que temos un goberno máis amplo e que conta con maioría neste pleno.” Bustelo tamén expuxo que os pasos dados ata a actualidade “é un novo treito na andaina que iniciaron nesta lexislatura e que se caracteriza polo incumprimento dos prazos e procedementos propios dos trámites desta institución, así como pola perpetuación dunha certa incapacidade para sacar adiante proxectos fundamentais para o noso municipio e que, ano noso entender, levan demasiado tempo paralizados.”
Ao reproche sobre os prazos uniuse o portavoz do PP, Germán Allut.
Pola súa parte, a socialista María del Carmen Figueira expresou que “o trámite é verdade que vai retrasado, é verdade que temos que intentar cumprir os prazos”, polo que “entre todos nós teremos que buscarlle a solución e ver dentro das críticas que poida haber.”
O alcalde Adolfo Muíños sinalou que a Conta Xeral é “un trámite basicamente administrativo, onde non se está dando apoio a unha xestión”, ademais de precisar que “non se alcuma de algunha maneira de incapaz con quen queres establecer algún tipo de lazo.” Así mesmo, o rexedor asegurou que son moitas as Administracións locais que se atopan con dificultades en ter algunhas materias “en tempo.” Unha situación que se debe, tal e como puntualizou, á “moitísima carga de información” sobre o persoal municipal en asuntos que non teñen que ver co Concello, senón procedentes doutras institucións. Neste senso, desexou que se tomen medidas noutros niveis para corrixir iso e “poder darlle a volta a esa situación” porque “senón, efectivamente, está habendo moitísimas dificultades e non ten que ver coa decisión do goberno.”
A cuestión saíu adiante cos votos a favor de BNG, PSdeG-PSOE e Ciudadanos, absténdose PP e Rianxo en Común.
