Ao redor de 500 persoas están inmersas na organización da cabalgata de Reis que se celebrará en Ribeira o domingo 5, a partir 18.00 horas, unha vez as Súas Maxestades de Oriente cheguen ao recheo portuario de Santa Uxía a bordo do Bus Real, cortesía do Grupo Ferrín, que estivo percorrendo o municipio desde o 10 de decembro. A súa recepción estará acompañada dun espectáculo pirotécnico.
A concelleira de Cultura, María Sampedro, foi a encargada de explicar tódolos detalles desta cita na que desfrutarán grandes e pequenos. A cabalgata estará integrada por dez carrozas encabezadas por un tren infantil con cincuenta cativos a bordo. No que respecta ás carrozas, en tres delas viaxarán Melchor, Gaspar e Baltasar, mentres que nas sete restantes irán os nenos e nenas de sete entidades locais: Amencer, Alfaia, Aires de Dorna, Francisco Lorenzo Mariño de Aguiño, Amas de Casa de Ribeira, Asociación de Veciños de Carreira e Flor de Toxo. Todas elas estarán engalanadas con temática do mundo dos contos, con referencias a Polgariño, Hansen e Gretel ou Alicia no País das Marabillas.
Como acompañamento musical, formarán parte do desfile o grupo de música tradicional Andavía, as charangas Os Santiaguiños e BB+, Fanfarria Furruxa, a banda de Barro e a banda de Cristo de la Buena Muerte de Ferrol. Como novidade, tamén asistirán tres coñecidos personaxes como son Elsa, de Frozen; Woody, de Toy Story; e Peppa Pig.
O itinerario é similar aos últimos anos, pois arrancará do recheo portuario e enfilará polo Malecón ata a rotonda da praza da Concordia, para proseguir pola rúa de Galicia ata a praza de Compostela, rúa Romero Ortiz, novamente Malecón, rúa Rosalía de Castro, rúa Alcalde Fernández Bermúdez, rotonda da Serea, rúa Rosalía de Castro e praza do Concello. Ao longo de todo o percorrido repartiranse entre os espectadores os 1.500 quilos de caramelos aptos para celíacos, 300 máis que o ano pasado. A continuación, os Reis Magos dirixiranse á veciñanza desde o balcón da Casa Consistorial, onde tamén farán o tradicional sorteo de agasallos, para de seguido dirixirse para saudar á rapazada nos soportais onde estarán colocados uns novos tronos feitos para tal ocasión.
Outra das novidades, segundo avanzou María Sampedro, é a recuperación dun Belén vivinte tras 26 anos sen emprender esta acción e grazas á iniciativa da Asociación Alfaia. Este nacemento situarase tamén nos soportais do Concello a partir das 18.00 horas, ata onde se achegarán as Súas Maxestades de Oriente para saudar ao neno Xesús.
A edil tamén fixo fincapé na importancia da seguridade, pola que velarán axentes da Policía Local, GAEM, Protección Civil e numerosos voluntarios, facendo especial mención aos integrantes de ICE Renovación, “que sempre teñen a ben acompañarnos e involúcranse dun xeito especial na cabalgata.”
Así mesmo, haberá un Punto de Recollida de Nenos Perdidos, servizo que se prestará na Casa do Concello a partir das 17.30 horas. Do mesmo xeito, no entorno da praza do Concello haberá un Punto de Auxilio de Protección Civil para atender calquera incidencia.
A pesar de que a cabalgata partirá de Santa Uxía ás 18.00 horas, nesa mesma xornada e desde ben cedo, o Bus Real, cos Reis Magos de Oriente a bordo, visitará as parroquias repartindo caramelos entre todos aqueles que os vaian recibir. As paradas que realizarán Melchor, Gaspar e Baltasar son ás 10.00 horas na rúa das Delicias de Corrubedo; ás 10.45 horas na Casa da Cultura de Olveira; ás 11.30 horas no Centro Social de Oleiros con visita ao Hospital da Barbanza; ás 12.30 horas no porto de Palmeira; ás 13.30 horas no porto de Castiñeiras; ás 16.00 horas na Aula de Música de Aguiño; ás 16.45 horas na Capela da Guía de Carreira; e ás 17.30 horas no Centro Recreativo de Artes.
