A Pousada retoma a súa actividade da man do trío The Levitans

08 Xaneiro 2020

Tralo respiro de Nadal, o gran local de concertos da nosa comarca, A Pousada da Galiza Imaxinaria, retoma a actividade cunha nova cita co rock independente e cancións orixinadas nas marxes do mainstream, un terreo firme e confortábel no que boa parte dos prestixiosos grupos e artistas que pasan cada ano polo local boirense asegurarían sentirse moi a gusto. Desta volta, o concerto de reactivación post-Nadal vén da man de The Levitans, trío de Valladolid con influencias dark pero con identidade propia (aí están eses temas sen baixo). The Levitans actúa o vindeiro 18 de xaneiro ás 22.30 horas no local que rexenta Suso Santamaría.

O grupo (formado por Sergio á voz e á guitarra, Dani á batería e Juan nos sintetizadores e nos coros) promete romper na súa actuación boa parte das nosas ideas preconcibidas sobre o que nos atoparemos na sala o día 18. Para empezar, aseguran estar moi cómodos alén todo o establecido: fan, como indican dende A Pousada, música rabiosamente nova, tan afastada do monotema pseudo-épico do indie nacional como da fauna sonora (trap, etc) que, talvez, por idade correspóndelles. Nesta tempada están a presentar Enola, o seu debut no selo Subterfuge, gravado nunha casa afastada da civilización onde o trío experimenta con música, meditación e outros elementos. O disco, realizado en 2018 nos Estudos Dobro baixo a produción de Javier Neto (técnico de Anxo Stanich, Arizona Baby), chega precedido de catro impactantes singles: Suicide, Red Lines, Kolmanskop e From the Other Side.

Outros artigos

Publicidade

Revista en papel

Opinión