Entre o 23 de decembro de 2019 e o 7 de xaneiro de 2020 estableceuse unha campaña de control de velocidade, alcohol e drogas, mediante a cal a Policía Local de Rianxo procedeu ao control dun total de 1.326 vehículos e efectuáronse 254 probas de alcohol e drogas. Neste senso, detectáronse un total de 22 infraccións administrativas relativas a velocidade, alcoholemias positivas e deficiencias na documentación de vehículos e condutores, así como instruíndose dilixencias xudiciais por un delito contra a seguridade viaria.
Dentro do plan de coordinación en materia de seguridade viaria, na tarde do sábado 4 efectuouse un control conxunto entre Policía Local de Rianxo e a Agrupación de Tráfico da Garda Civil. Deste xeito, realizáronse 70 probas de alcoholemia, arroxando unha positivo. Tamén se detectaron dúas infraccións relativas a permisos de condución, razón pola cal se cursaron as pertinentes denuncias.
Ademais, os axentes déronlle o alto a un ciclomotor na mañá do luns 6. Unha vez procederon á súa identificación, comprobouse que dito ciclomotor carecía de seguro obrigatorio desde o 2014 e sen efectuar as inspeccións técnicas obrigatorias desde o 2015. Así mesmo, o piloto carecía de licencia de condución en vigor, polo que se procedeu á inmobilización e depósito do vehículo ata a resolución das deficiencias detectadas.