A Asociación Boirense de Empresarios anunciou na xornada de onte o número agraciado co Sueldazo ABE, unha das iniciativas enmarcadas na campaña de Nadal. Tras a realización do sorteo no que se extraeu o boleto gañador, ademais de catro suplentes, anunciouse que o número premiado era o 44.496, o cal fora entregado en Paquetería Josefina. Poucas horas despois, Tamara Linares presentou a rifa agraciada, converténdose nunha das máis rápidas en aparecer na longa historia dos premios de Nadal da ABE.
O presidente da entidade, Daniel García, entregou na tarde de onte o premio a unha emocionada Tamara, quen recibirá cada mes 300 euros en vales de compra a gastar durante o presente curso, agás o mes de xaneiro, nos establecementos participantes na campaña.
Así mesmo, Aitor e Rosalía convertéronse nos gañadores do patinete LED e o patinete eléctrico, respectivamente, os cales se sorteaban entre tódolos cativos que depositasen as súas cartas aos Reis Magos na Carpa dos Soños. Ambos xa pasaron pola sede da ABE para recoller os seus agasallos.
Con estas entregas, a entidade finaliza a campaña propia desta época e comeza a preparar as actividades do 2020, agardando que teñan tan boa acollida coma as do ano pasado.
