Alumnado de tres centros educativos de Boiro -IES Praia Barraña, IES A Cachada e IES Espiñeira- participaron a pasada semana nunhas charlas de sensibilización e prevención da violencia machista organizadas polo Centro de Información á Muller (CIM) boirense, contando co financiamento do Ministerio de Presidencia, Relacións coas Cortes e Igualdade para a realización de proxectos ou programas que teñen como finalidade o desenvolvemento das medidas do Pacto de Estado en materia de violencia de xénero.
Emily Rodríguez e Noelia Míguez relataron aos estudantes os anos de maltrato continuado, tanto psíquico coma físico, que sufriron por parte de ex-parellas, transmitíndolle ao alumnado de cuarto da ESO e Bacharelato como lograron saír desas relacións danosas e do círculo da violencia. A mensaxe que se intenta comunicar con estas sesións é a da necesidade de afrontar o problema das violencias machistas desde a base, que é a educación.
Neste senso, Emily, Noelia, persoal do CIM e profesorado dos tres centros citados anteriormente indicáronlle ao alumnado que o entorno é unha peza clave para que a muller que sofre calquera tipo de violencia se sinta apoiada, denuncie e abandone ao seu agresor. Ademais, o Centro de Información á Muller presentou os servizos que desde o Concello se ofrecen para a consecución da igualdade entre homes e mulleres, tales coma o asesoramento xurídico, a atención psicolóxica ou orientación profesional e sociolaboral.