O galego Sergio Pazos, actor, humorista, presentador e monologuista, vai estar este 8 de decembro no Teatro Elma da Pobra (ás 19.00 horas) representando o seu espectáculo Afiando con humor. A obra, que é de balde, é unha proposta na que o actor ourensán debulla as cousas do mundo a través dunha das nosas máis antigas e representativas profesións: a do afiador.
O actor aproveita que vén de Ourense, coñecida como a “terra da chispa” (por ser terra de afiadores), e métese na pel dun deles para contar á xente quen son, de onde veñen e onde van estas persoas que “sempre percorreron o mundo contando historias do que vían, do que vivían e do que escoitaban”.
Segundo explica o Concello da Pobra, impulsor desta nova cita cultural (a través da Concellería de Cultura en colaboración coa Deputación da Coruña), Afiando con humor é un espectáculo de narración oral onde se pretende “dignificar, recuperar, e falar da vida destes profesionais ancestrais”, unha vida itinerante, dura, solitaria ás veces, pero “unha vida chea de orgullo” e, tamén, de historias que contar.
Sergio Pazos reivindica así un xeito de traballar e vivir que se está a perder para sempre na nosa terra, aínda que tamén é certo que en certa maneira os seus modos profesionais seguen aínda vixentes: “Non hai que esquecer que o afiador é o primeiro emprendedor, o primeiro autónomo, o primeiro emigrante, ou como dirían naquel anuncio da televisión: tres nun”.