O Concello da Pobra do Caramiñal, a través da Concellaría de Participación Veciñal, pon en marcha unha nova actividade de taichí terapéutico destinada a promover hábitos saudábeis, favorecer o benestar físico e emocional e ofrecer espazos de encontro para a veciñanza.
As sesións desenvolveranse en dous puntos do municipio: na Escola Unitaria do Vilariño, os mércores ás 19.00 horas, e no Centro Social de Santa Cruz, os martes ás 10.30 horas. Mentres non estea dispoñible o espazo previsto en Santa Cruz, as clases realizaranse provisionalmente na Casa da Mocidade.
O programa prolongarase entre os meses de xuño e decembro de 2026. As actividades darán comezo os días 16 de xuño, no Centro Social de Santa Cruz, e 17 de xuño, na Escola Unitaria do Vilariño.
A iniciativa estará impartida por Sergio García Pose, fisioterapeuta diplomado pola Universidade da Coruña con máis de vinte anos de experiencia profesional e instrutor de Tai Chi Chuan e Chi Kung da Escola Galega Ma Tsun Kuen.
A concelleira Amparo Cerecedo salientou a importancia de impulsar propostas que contribúan a mellorar a calidade de vida da cidadanía a través da actividade física adaptada. Neste sentido, destacou que o taichí terapéutico constitúe unha práctica accesíbel para persoas de diferentes idades, combinando movemento, coordinación, equilibrio e concentración.
As persoas interesadas poden formalizar a súa inscrición no Rexistro Municipal ou a través da sede electrónica do Concello.
Para obter máis información está dispoñible o teléfono 981 832 764 (extensión 1).
Con esta iniciativa, o Concello continúa ampliando a súa programación de participación veciñal e promoción da saúde, favorecendo o envellecemento activo e o benestar da poboación.
