Para contrarrestar o tren de temporais e galernas, a finde cultural de Rianxo achégase cargada de actividades, cousa que é de agradecer. A Área de Cultura de Rianxo puxo a punto a súa capacidade de elaborar axendas completas e, deste xeito, entre o venres e domingo están previstas sete citas para veciñas e veciños de todas as idades. O programa comeza este 19.30 horas, no Centro Social da Atalaia-Asados, co contacontos Unha de contos descontados, a cargo de Ogue 5 (Escola de Teatro Airiños). Será unha cita para nenas e nenos (e nenas e nenos grandes, tamén) inserida no programa Veladas de Inverno que desenvolve Airiños estas festas de Nadal en Asados.
A axenda prosegue pouco despois, este venres, na sala de exposicións do Auditorio de Rianxo, onde se procederá á apertura da exposición de gravados Sempre en Galiza. Homenaxe Artistas Galegos. Máis tarde, sobre as 21.00 horas, tamén no Auditorio (na sala Arcos Moldes) proxectarse o novo (un incontestábel éxito galego de público e crítica) filme do director lucense Oliver Laxe: O que arde.
Ao día seguinte a actividade non decrece, e comeza relativamente cedo (a partir das 12.00 horas) co Festival de Nadal da Asociación Escola de Música de Rianxo, na sala Arcos Moldes do Auditorio. Esta cita músico-festiva, que como todas as demais conta coa colaboración do Concello, artéllase en dúas sesións: unha primeira ás 12.00 horas e outra segunda ás 18.00 horas.
O sábado, ademais, proseguirá o festival de teatro de Airiños no Centro Social da Atalaia-Asados. E farao achegando teatro xuvenil a cargo de Patakamakabra, da Escola de Teatro Airiños, que van representar a peza Lendatarias a partir das 19.30 horas.
O domingo 22 a axenda de actividades ofrecerá á veciñanza outra cita de celebración coa que contrarrestar o mal tempo reinante estes días: o Festival de Nadal que se celebra a partir das 19.00 horas (organizado por Fogo Fatuo e o Concello, con entrada de balde até completar o aforo). Na mesma xornada do domingo, o Centro Social da Atalaia-Asados acollerá ás 19.30 horas outra gran representación teatral: a obra Unha primavera para Aldara a cargo de Teatro Airiños e a partir das 18.00 horas. Como lembrarmos, Unha primavera para Aldara está dirixida por Amantia Coello e baseada nun texto de Teresa Moure, autora tamén de Herba Moura ou Ostrácia (a vida da amante de Lenin, Inessa Armand). A obra lévanos da man á Galicia do século XV, durante a Revolta Irmandiña, máis polo miúdo á vida dun convento rexido pola abadesa Aldara Eáns, que discorre con tranquilidade até que chega ás súas portas, en primavera, un guerreiro irmandiño ferido, Don Nuno, pedindo acubillo.
