JEALSA, a conserveira de Boiro, está a avanzar treitos relevantes en materia de política de responsabilidade social corporativa (o programa WeSea). Froito deste compromiso solidario e medioambiental xorden iniciativas como as campañas colectivas para a limpeza de praias (que os días pasados tiveron un novo capítulo en Carragueiros, que se saldou coa recollida de de 235 quilos de lixo) ou as accións de axuda para as mascotas abandonadas. Nesta liña, a empresa PetSelect (pertencente a JEALSA) deu a coñecer a doazón de máis de 30.000 quilos de alimentas para varias protectoras animais da nosa terra. Estas contribucións posibilitaron alimentar a máis de 29.000 cans e gatos.
As doazóns foron entregadas o pasado venres 29 de novembro. En total, beneficiáronse delas oito organizacións galegas: Asociación Vila Peixiño de Gondomar, Argo (Santiago), Axúdanos (Santiago), Callejeros Barbanza, Cometa (Ferrol), Protectora de Vilagarcía, Refuxio de Bando (Santiago) e Terracan (Ferrol).
Segundo sinalou o director comercial e de mercadotecnia da firma PetSelect, José Antonio Álvarez, “as protectoras dan refuxio e protexen aos animais abandonados mentres non atopan unha familia que os adoptan, e como empresa comprometida co coidado animal e por suposto coa nosa contorna, a través do noso programa de RSC WeSea, establecemos mecanismos de colaboración con estas entidades para acompañarlles durante ese espazo de tempo”.