A Sala Arcos Moldes do Auditorio municipal de Rianxo acollerá o venres 20, ás 21.00 horas, a proxección do filme O que arde, de Oliver Laxe. A sinopse desta cinta fala de que ninguén agarda a Amador cando sae da cadea tras cumprir condena por ter provocado un incendio. Regresa á súa casa, unha aldea perdida das montañas lucenses, onde volverá convivir coa súa nai Benedicta, a súa cadela Luna e as súas tres vacas. As súas vidas transcorren ao ritmo sosegado da natureza, ata que todo cambia cando o lume violento arrasa a zona.
Cunha duración de 85 minutos, a película está recomendada para un público maior de 7 anos. A entrada é de balde ata completar capacidade, procedendo á retirada dos tíckets unha hora antes do comezo da proxección, cun máximo establecido en 2 por persoa.
