O Bloque Nacionalista Galego de Ribeira vén de formalizar unha petición para que se aceleren as obras de posta en valor do parque García Bayón, que están a ser obxecto dunha remodelación integral tanto na súa estrutura como no que se refire ás áreas e elementos de lecer. O BNG local pide ao Goberno municipal que se fagan avanzar os traballos para abreviar e minimizar na medida do posíbel o trastorno económico que están supoñendo os traballos para os establecementos comerciais da zona.
O concelleiro Luís Pérez Barral argumentou “que os negocios que hai nesa área de lecer precisan que as obras estean listas canto antes”, con vistas a que “as familias poidan volver levar ás crianzas a esa zona infantil”.
Segundo Pérez Barral, foron varios os negocios os que se puxeron en contacto co BNG para pedir información preocupados polo avance da reforma. En base a isto, o grupo nacionalista local sostén que o Goberno municipal “debería informar puntualmente aos comerciantes e hostaleiros, mais non o fai, polo que tivemos que ofrecerlle a información nós mesmos”. O Bloque engade que resulta “de vital importancia” que as obras se realicen “cunha boa planificación”, co obxectivo de “minimizar o impacto negativo” que producen nos negocios. Tamén piden máis información por parte do Concello.
