Malia que en certos ámbitos non deixan de enxalzarse tristemente as bondades de deixar a nosa terra de orixe na procura dunhas oportunidades laborais que o noso lugar de orixe non nos ofrece, para o Bloque Nacionalista de Galego a emigración foi, é e será sempre unha lacra, un drama que aínda segue vixente e ao que cómpre poñer solución definitiva. Por estes e outros motivos, o BNG de Barbanza vén de lanzar unha proclama para acadar a máxima participación nas concentracións (medio cento delas) que se van levar a cabo este sábado nunha chea de concellos galegos, incluídos os da nosa comarca. As mobilizacións, convocadas por Vía Galega, terán tres convocatorias no Barbanza: perante os consistorios de Ribeira e Rianxo e na praza de San Roque de Noia a partir das 12.00 horas deste sábado.
As concentracións, desenvolvidas ao abeiro da campaña Non Emigramos, Expúlsannos, buscan denunciar “a situación de emigración forzada á que se ven sometidas millares de persoas cada ano no noso país”.
Segundo declarou o responsábel comarcal, Luís Pérez Barral, “imos apoiar estas concentracións porque entendemos a emigración como o síntoma principal dunha economía subalterna, que non aproveita as verdadeiras potencialidades de Galiza, e que se limita, na práctica, a fornecer materias primas en lugar de terminar os ciclos produtivos no país”.
O Bloque engade que “esta orientación non é casual, senón produto da falta de soberanía política, da dependencia das relacións económicas a respecto de Madrid e da falta de interese dos diferentes gobernos autonómicos en promover unha economía autocentrada e que trataremos de reverter mediante os representantes propios do BNG nas diferentes institucións”. A agrupación comarcal, por estes motivos, fai un chamamento a concorrer nas concentracións, acompañando estas accións co traballo da agrupación política para facer que as institucións recoñezan a emigración actual “como unha emerxencia nacional e se activen, dunha vez, os mecanismos para remediar esta lacra”.
