A Asociación Protectora de Animais Moura atópase traballando arreo a través da realización de eventos e recadacións para acadar o diñeiro necesario para pagar a débeda veterinaria adquirida. Cómpre lembrar que se trata dunha entidade sen ánimo de lucro, cuxo labor se centra na recollida de animais que se atopan en situación de abandono, desamparo ou maltrato, tratando de proporcionarlles unha vida digna e persoas comprometidas que ofrezan un fogar responsable con disposición a adoptar ou acoller.
Na súa páxina de Facebook informan de que está á venta o calendario solidario a un prezo de 3 euros no Hospital Veterinario Ramiro Tubío e, proximamente, en máis locais. Tamén organizan unha cea para o venres 20 no restaurante Sisal, na Pobra, acompañada de sorteos e da música de Arrancadeira, podendo adquirirse as entradas en Foto Rioss (A Pobra) e Peluquería Aurora (Boiro). Da mesma maneira, facilítase a compra de rifas a 1 euro para a súa cesta de Nadal; así como participacións da lotaría.
Ademais, existe a posibilidade de realizarse unha instantánea solidaria con mascota no estudo fotográfico referido anteriormente.
