A corporación municipal de Boiro reuniuse na noite de onte para celebrar o pleno ordinario correspondente ao mes de decembro. Unha sesión que durou catro horas e no que quedou sen debater un dos puntos da orde do día, concretamente a moción presentada por Boiro Novo relativa á instalación no municipio de puntos de recarga para vehículos eléctricos, polo que se tratará na seguinte sesión.
Unha vez aprobada por unanimidade a acta da sesión plenaria do 14 de novembro, procedeuse a abordar a modificación do acordo de denominación da rúa Traballadoras do Mar, sendo aprobado tamén por unanimidade.
De seguido, debateuse a cuestión relativa ao nomeamento da rúa número 6 do planeamento municipal como avenida empresario Jesús Alonso Fernández. Carlos Rodríguez, de Ciudadanos, cualificouno como “débeda histórica” para marcar referentes para a mocidade, destacando o apoio da empresa JEALSA Rianxeira ao deporte e a súa aportación a poñer o nome de Boiro “no mapa de Europa, no mapa do mundo e o pon con letras de ouro.”
Provisto de numerosos documentos, Manuel Velo, de IC Boiro, expuxo os seus argumentos para votar en contra, sinalando que “oito anos do Partido Popular e non fixeron este nomeamento e, sen embargo, faino o goberno do PSOE.” Velo comezou esgrimindo as diversas razóns polas que non ía apoiar a proposta, precisando que a institución política “non é un sitio de tráfico de influencias”, incidindo en que non se malinterpretasen as súas palabras porque “longa vida ao señor Alonso e longa vida a JEALSA.” Velo fixo numerosas referencias á faceta política de Jesús Alonso e apuntou que “non é o que máis cartos teña, é o que mellor o fixera socialmente.” Ademais, manifestou que, no seu día, “o problema veu cando quixo competir comigo pola Alcaldía e entón quixo arrasar todo, e arrasou todo.” Do mesmo xeito, asegurou que “saben ben o que fan, teñen marketing e sabían que isto ía ocorrer de dividir ao goberno.”
A voceira de Boiro Novo, Dores Torrado, manifestou que non se podía separar a figura política da empresarial, polo que presentaban unha emenda á proposta consistente en nomear como rúa da Industria Conserveira porque “as sinerxías son as que xeran máis riqueza que volve outra vez á economía local a través do consumo e a través tamén de apoio ao tecido social, cultural e deportivo do noso concello. Non é mérito dunha soa persoa, é mérito do conxunto do pobo de Boiro que tamén puxo o gran de area na súa empresa.” Ademais, fixo fincapé en que hai que ter en conta os méritos e deméritos, e aproveitou a ocasión para recordar que noutros concellos se esixe o voto unánime da corporación para sacar adiante unha proposta destas características.
Pola súa parte, a portavoz do BNG, Raquel Suárez, afirmou concordar coa exposición de Boiro Novo e a emenda, estando dispostos incluso a aceptar o nomeamento dunha rúa como JEALSA Rianxeira. Suárez asegurou que, en relación á faceta de empresario, nunha ocasión “o señor Alonso aproveitouse do seu posto como empresario para chantaxear á veciñanza de Boiro” e “quixo condicionar o futuro político do pobo de Boiro.” Respecto ao voto favorable do PSdeG-PSOE, criticou que “non sei onde queda a súa coherencia, non sei onde quedan os seus ideais, pero, dende logo, moito xeito non ten.” O seu compañeiro de partido, Carlos Ansoar, cualificou como “moi pobre” seguir o mérito do valor económico para outorgar a referida distinción.
Mentres tanto, o socialista José Luis Ruiz lembrou que esa solicitude fora rexistrada no mes de abril asinada por un total de 19 entidades, entre deportivas e sociais, polo que “trasladamos hoxe a este pleno para que cada un dos representantes públicos se manifeste sobre a mesma, cumprimos co noso deber.” O seu compañeiro, Marcos Fajardo, remarcou que “nós temos que ser responsables ante unha petición popular tan evidente” e asegurou que, como traballador da empresa, sempre houbo liberdade sindical, “algo importantísimo para os traballadores.”
Ante isto, Dores Torrado respondeu que non se cuestionaba que se levase a pleno a cuestión por parte da cidadanía, senón a posición do PSdeG-PSOE a este respecto.
Pola súa parte, o voceiro do PP, Juan José Dieste, sostivo que “aquí hai ningunha xenerosidade e moita bile. A bile atrofia o sentido. Moitísimo sectarismo político e ideolóxico” e salientou os logros acadados por Jesús Alonso ao longo da súa traxectoria, manifestando que “leva o nome de Boiro por todo o mundo” e falou de que o empresario ensinou valores “de liberdade, de ser coherente, atender a todo o mundo, política empresarial aberta, de ideas abertas.”
Finalmente, a emenda foi denegada cos votos en contra de PSdeG-PSOE, PP e Ciudadanos, votando a favor Boiro Novo, BNG e IC Boiro; mentres que a proposta inicial saíu adiante cos votos a favor de PSdeG-PSOE, PP e Ciudadanos, a pesar dos votos en contra de BNG, Boiro Novo e IC Boiro.
A continuación, procedeuse á aprobación inicial da Ordenanza municipal de circulación que foi denegada cos votos en contra do PP, a pesar dos votos favorables do PSdeG-PSOE e IC Boiro, absténdose BNG, Boiro Novo e Ciudadanos.
O punto referente á modificación do Regulamento Orgánico Municipal para a creación da Xunta de Portavoces para o cal se requiría a maioría absoluta, foi denegado cos votos en contra do PP, a pesar dos votos favorables do PSdeG-PSOE, IC Boiro e Ciudadanos, absténdose BNG e Boiro Novo.
No que respecta ao Regulamento municipal de uso e xestión dos espazos asignados aos grupos políticos na Casa do Concello, a proposta foi aprobada cos votos favorables do PSdeG-PSOE, Boiro Novo, IC Boiro e Ciudadanos, votando en contra o PP e absténdose o BNG.
Outro dos aspectos a tratar foi a proposta de participación do concello no POS+2020, saíndo adiante cos votos favorables do PSdeG-PSOE, Boiro Novo e IC Boiro, absténdose PP, BNG e Ciudadanos.
En relación á adxudicación dos contratos de préstamo, este punto foi aprobado cos votos favorables do PP, PSdeG-PSOE e IC Boiro, votando en contra Boiro Novo e absténdose BNG. O representante de Ciudadanos, Carlos Rodríguez, non se atopaba no salón de plenos no momento da votación.
Despois efectuouse un cambio na orde do día, abordándose a moción número 13, presentada polos socialistas con motivo de apoiar ao sector mar-industria alimentario da comarca fronte ao proxecto de reforma da lexislación de Costas e na que interveu unha persoa do público. O asunto saíu adiante cos votos favorables do PP, PSdeG-PSOE, Boiro Novo, IC Boiro e Ciudadanos, absténdose BNG.
Pola súa parte, o grupo municipal do BNG presentou dúas mocións. A primeira, relativa coa proposta da plataforma Vía Galega sobre a emigración, saíu adiante cos votos favorables do BNG, PSdeG-PSOE, Boiro Novo, IC Boiro e Ciudadanos, a pesar dos votos en contra do PP. A segunda, sobre a estrada provincial DP-1105 Boiro-Noia, foi aprobada por unanimidade.
Por último, a moción presentada polo grupo municipal do PP en defensa das liberdades educativas consagradas na Constitución Española foi denegada ao contar unicamente cos votos a favor do PP, votando en contra o PSdeG-PSOE, BNG, Boiro Novo e IC Boiro, absténdose Ciudadanos.