A avenida da Constitución volve a albergar desde hoxe o mercadiño semanal que cada martes se celebra en Boiro. O tempo acompañou e numerosas persoas achegáronse ata os máis de setenta postos emprazados na nova localización. Ata alí desprazáronse o rexedor do municipio, José Ramón Romero, e o tenente de alcalde, José Luis Ruiz. O mandatario local expresou que as tres primeiras semanas servirán para ir adaptando progresivamente o mercado. Neste senso, o obxectivo é acadar un “mercadiño agradable e adaptado ao entorno do casco.” Así mesmo, precisou que os establecementos hostaleiros tamén rexistraron un aumento da concorrencia.
Ademais, o mercadiño realizarase tamén durante as datas do Nadal, tanto o 24 coma o 31 de decembro, coa intención de impulsar o cambio de localización, especialmente nesta época.
