Este sábado 14 de decembro vaise celebrar en Boiro, na Casa da Cultura Ramón Martínez López a partir das 12.30 horas, un dos grandes acontecementos culturais do ano na nosa terra: a entrega de galardóns dos XIII Premios Barbantia da Cultura. Na cita, organizada pola Asociación Cultural Barbantia, La Voz de Galicia, a Deputación da Coruña e o Concello de Boiro, tamén está previsto presentar o Anuario de Estudos de Barbanza 2019, o volume número 15 da senlleira publicación cultural da dita asociación e as/os seus integrantes.
Na entrega de galardóns, conducida pola actriz e escritora rianxeira Esther Carrodeguas, distinguirase o labor e a contribución cultural do artista Xoán Fernández (Premio Barbantia á Traxectoria Cultural no Barbanza 2019), o local boirense A Pousada da Galiza Imaxinaria (Premio Barbantia á Iniciativa Cultural no Barbanza 2019) e a poeta noiesa Ana Romaní (Premio Barbantia da Cultura Galega 2019). Os premiados foron elixidos os días pasados a través dos votos dos membros de Barbantia (un proceso de votación que rematou o sábado 30 de novembro).
