Boiro desenvolverá ao longo destas datas o programa de actividades que leva por título Un Nadal de Ensoño, englobando citas culturais, espectáculos, festivais e outros eventos promovidos por asociacións do municipio. Así, perséguese a dinamización cultural, a conciliación familiar e o fomento das compras no comercio local. Os encargados de explicar as características desta programación foron a concelleira de Cultura, María Outeiral; o presidente da Asociación Boirense de Empresarios (ABE), Daniel García; e as técnicas de Cultura, Elena Dosil, Manola Ferreirós e Alberto García.
Desta maneira, preparouse un amplo abano de citas culturais destinado á poboación en xeral e, especialmente, ás crianzas “pois consideramos que teñen un especial protagonismo e queremos fomentar a ilusión nestas datas tan especias”, tal e como expuxo Elena Dosil. O núcleo destas actividades desenvolverase na Carpa dos Soños, a cal estará situada na praza do Concello, sendo escenario de numerosos espectáculos e da ludoteca. Para acceder a esta última será preciso presentar un tícket de compra por importe superior a 20 euros en calquera dos establecementos boirenses e permanecerá aberta en horario de 17.00 a 19.00 horas os días 23, 24, 26, 27, 28 e 30 de decembro, así como o 2, 3 e 4 de xaneiro.
Así mesmo, realizarase un Campamento de Nadal destinado a nenas e nenos durante as vacacións, desenvolvéndose nas mañás dos días 23, 24, 26, 27, 30 e 31 de decembro, así como o 2 e 3 de xaneiro, en horario a escoller polas familias: de 09.30 a 13.30 horas ou de 11.30 a 13.30 horas.
Segundo destacou Manola Ferreirós, todo isto supón “un gran esforzo económico para o noso Concello”, engadindo que “este ano creo que se lle dou un gran impulso a que o Nadal sexa unha época da nosa vida cotiá con gran protagonismo.” Entre as citas enumeradas figura o percorrido que fará o Apalpador o 26 de decembro, a partir das 17.00 horas, polas rúas do concello e, posteriormente, ofrecerá un espectáculo de narración. Deste xeito, pretenden recuperar este personaxe da tradición galega, co obxectivo de equiparalo a Papá Noel ou aos Reis Magos.
Pola súa parte, Alberto García salientou o labor de tódalas asociacións do municipio que contribúen a enriquecer estas festas, producíndose unha unión entre institucións públicas, entidades privadas e tecido asociativo. Neste senso, sinalou a Cabalgata de Reis organizada pola asociación de veciños de Escarabote, así como diversos festivais “moi exitosos.”
O presidente da ABE, Daniel García, aproveitou a ocasión para presentar o Sueldazo ABE, “unha campaña novidosa que cremos que vai ser moi interesante e atractiva para o público.” Esta iniciativa consiste nun soldo de 300 euros durante seis meses para o único gañador dun sorteo que se realizará entre tódalas rifas numeradas -un total de 90.000- que repartirán ao redor dos 40 establecementos participantes de Boiro aos clientes por cada compra de 10 euros. Tamén se entregará a carta aos Reis Magos nos locais participantes, onde os cativos escribirán as súas peticións para, a continuación, depositala na Carpa dos Soños. Deste xeito, entre tódalas cartas sortearanse dous monopatíns, un tradicional e outro eléctrico.
Finalmente, a edil María Outeiral expuxo que programación de Nadal tamén inclúe o mercado Factoría das Raíñas, situado no local multiusos do mercado municipal durante as xornadas do 28 e 29 de decembro, de 11.00 a 14.30 horas e de 17.00 a 22.00 horas. Este espazo corre a cargo de Paula Tubío, dispoñendo de nove postos de artesanía, dous de gastronomía e un de cervexa artesá. Ademais, anunciou que se realizará o sorteo dunha noite nunha casa rural entre os tíckets que cubran os visitantes do Belén.
