O alcalde de Boiro, José Ramón Romero, e o oficial da Policía Local do municipio, José Manuel Somoza, mantiveron esta mañá unha xuntanza na sede da Dirección Xeral de Tráfico (DXT) coa xefa provincial de Tráfico en A Coruña, María Victoria Gómez Dobarro, abordando diversos asuntos que atinxen á seguridade viaria da localidade.
A situación actual do municipio en canto a controis de alcohol e drogas constituíu un dos principais temas a tratar. Así mesmo, o oficial da Policía Local amosoulle á xefa territorial a súa preocupación pola prevención de riscos e a aposta pola seguridade viaria. Neste senso, apuntouse á sinalización dos peóns en caso de accidente como unha eiva importante. Deste xeito, e tras a referida reunión, os vehículos policiais de Boiro están equipados con diversos chalecos reflectantes para, en caso dun accidente, facilitarllos aos peóns e incidir así na prevención de riscos.
Ademais, a entidade e o Concello conversaron sobre as liñas de colaboración que teñen abertas ata o de agora, tales coma as xornadas formativas de seguridade viaria que se imparten desde a entidade local a nenos e maiores, ao ser considerados os colectivos máis vulnerables. Tamén se dialogou acerca da posibilidade de ampliar esta colaboración abrindo novas liñas, tanto nas campañas que promove a DXT coma noutras tarefas para mellorar e incrementar a vixilancia e a prevención no municipio.
