Este sábado 28 de decembro temos unha cita co circo e máis co humor a partir das 19.15 horas na Carpa dos Soños instalada polo Concello de Boiro. A agrupación encargada de achegarnos á sempre interesante confluencia entre a maxia, as acrobacias e máis a retranca (a fórmula clown no seu estado puro) será Circo Chosco, que representará o espectáculo Riscando o ceo, unha proposta circense-literaria que rende homenaxe a O principiño de Antoine de Saint-Exupery e os seus personaxes a través da proximidade, a visualidade e a emoción para todos os públicos.
En palabras da agrupación, trátase “dun show de circo que chega ao corazón de todo tipo de persoas a través dun clown con capacidade para facer as cousas do revés”. O espectáculo, que ten como protagonista ao experto en acrobacias, maxia e equilibrios Óscar Páez, terá unha duración de 45 minutos. Trátase dunha obra para todos públicos.
