O Concello de Boiro procedeu nas últimas semanas á instalación de contedores de aceite usado en diversos puntos do municipio para fomentar a reciclaxe destes residuos entre a veciñanza.
Tras a aprobación desta medida levada ao pleno ordinario de novembro por Boiro Novo, a Concellería de Medio Ambiente iniciou os trámites para a colocación destes colectores, os cales son de cor vermella e están situados xunto aos contedores destinados ao depósito doutro tipo de residuos. En total prevese a instalación de dezaoito puntos de recollida de aceite, contando xa con eles varias zonas do casco urbano, así como lugares de Abanqueiro, Ponte Beluso ou Escarabote, entre outros.
O aceite depositarase nos colectores en botellas de plástico para, posteriormente, efectuar a súa recollida e traslado a centros de transferencia para separar os posibles impropios e destilar para a eliminación da auga, os sedimentos e os posibles metais pesados. Os usos que se lle poden atribuír ao aceite reciclado son como biocombustible para motores diésel, abonos, ceras, vernices, cremas ou deterxentes.
