Este 29 de decembro a cada vez máis nutrida comunidade de activistas ambientais de Barbanza teñen unha nova cita en Froxán (Lousame) para pór de relevo a importancia de coidar o noso bosque e reivindicar e protexer as nosas especies autóctonas. A nova convocatoria deste 29D (a Roga de San Silvestre) será unha nova quedada de erradicación comunitaria e participativa de especies invasoras, un novo capítulo de concienciación activa para converter Froxán nun referente mundial de loita contra contra a desaparición do bosque propio e de loita contra os lumes forestais (especialmente presentes cada ano en Lousame e nos montes que este concello comparte con Boiro).
Esta última xeira do ano das Brigadas Deseucaliptizadoras centrarase pois na Área Conservada pola Comunidade Local de Froxán, en Lousame, recoñecida como ICCA (Indigenous and Community Conserved Areas) polo programa das Nacións Unidas para o Ambiente. Na roga, cuxo comezo está previsto para as 9.30 horas, botarase man de machadas, motoserras e rozadoras para eliminar especies exóticas invasoras, desta volta, eucalipto, mimosa (acacia dealbata) e acacia bastarda (robinia pseudoacacia), e preparar o terreo para a súa restauración con especies de bosque nativo.
Desta volta o punto de encontro será ás 9.30 horas ao pé do antigo edificio de Compresores das Minas de San Fins. Para participar nesta acción é necesario que estamos inscritas e inscritos como brigadistas no proxecto, o que se pode facer por medio dun formulario específico habilitado, amais de indicar o compromiso expreso de acudir a esta convocatoria en brigadas@verdegaia.org. Temos até o venres 27 de decembro para formalizar a inscrición.
Despois dos traballos colectivos no monte (roga), premiarase ás brigadistas asistentes cun xantar de convivio (albaroque).
