O Concello de Boiro, a través da Oficina Municipal de Información á Xuventude (OMIX), reactivou estes días o seu programa de mentoring creativo, dirixido a subministrar asesoramento para facer voar o talento empresarial-emprendedor e a capacidade innovadora da mocidade local, ao tempo que se achegan casos de éxito da mocidade boirense. A primeira das sesións comezou este luns 2 de decembro, no IES Praia Barraña, e seguirá nos demais centros de educación secundaria do municipio.
Os alumnos de Bacharelato do IES Praia Barraña asistiron a unha charla de Alba Carreño sobre o seu labor en Mobalco, a empresa de Pobra do Caramiñal referente galego e estatal na fabricación de mobiliario de cociñas de deseño. Nesta sesión, as e os participantes introducíronse de cheo no día a día da firma pobrense e na experiencia inspiradora de Alba Carreño.
Unha gran canteira profesional e empresarial
O Concello de Boiro, impulsor deste programa de mentoring creativo, quere tirar proveito do importante tecido local de creatividade e emprendemento, con xente nova que, grazas a este proxecto, mostra as súas experiencias perante os estudantes. Persoas que crearon empresas locais como La Doce, Moai, A Fiestra, Nude Atelier, Diane Onlooker, Serarte, Baldani, Ágora Café Literario e Triwus e que expoñen cadansúas andainas innovadoras ante as alumnas e os alumnos.
O proxecto de mentoring creativo é un proxecto da Concellería de Cultura do Concello de Boiro e conta co financiamento da Dirección Xeral de Xuventude, sendo unha das actividades de República Creativa. A primeira das sesións foi onte, pero haberá outra o mércores día 4, ás 9:30 horas no IES Espiñeira, na que Sara Ollero falará do proxecto creativo DariaLuv. Para finalizar, o venres 17 de xaneiro ás 11:15 horas, a deseñadora Mónica Vigo achegará a súa experiencia no IES A Cachada.
