Boiro albergará esta fin de semana unha nova edición da Exposición da Camelia Sasanqua e outras. Unha mostra que xurdiu dezaseis anos atrás a raíz da proposta dos amigos dunha das organizadoras, Ana Calo, e que chega a esta convocatoria con máis de trinta expositores, podendo contemplarse ao redor dunha centena de variedades de camelia procedentes de distintos puntos da Península Ibérica. Así o deron a coñecer esta mañá o tenente de alcalde de Boiro, José Luís Ruiz; unha das promotoras desta exposición, Ana Calo; e a creadora da Camelia Boiro, Begoña Franco.
Esta cita desenvolverase no local multiusos do mercado municipal, dispoñendo tamén duns lenzos de Rosa Crespo que adornará a sala durante as dúas xornadas para, posteriormente, trasladalos á Casa da Cultura ata o 17 de xaneiro. Segundo manifestou Ana Calo, este evento diferénciase do resto en que “a raíña principal é a camelia Sasanqua.” Tamén anunciou que á mostra asistirán representantes de Celorico de Basto, en Portugal, unha vila onde a camelia é fundamental, razón pola cal lle organizan unha festa. O obxectivo desta visita radica en promocionar o referido festexo ao tempo que potencian a exposición de Boiro.
O programa de actividades desta edición arranca o sábado, a partir das 17.00 horas co acto inaugural no que participará a Escola de Música de Boiro. Así, ás 17.30 horas procederase ao chantado simbólico da camelia Molinera (Sasanqua de flor vermella, creación de Begoña Franco) no parque da Cachada, dedicándose a Javier Cortés, concelleiro de Cultura do 2003 e un dos impulsores desta cita. O acto contará coa asistencia da súa viúva e os seus fillos.
A mostra continuará na xornada do sábado ata as 20.30 horas e o domingo 15 estenderase en horario de mañá e de tarde: de 11.00 a 14.00 horas e de 17.00 a 20.30 horas.
Así mesmo, desenvolverase o Menú Camelia, no cal numerosos locais hostaleiros participarán con diversas ofertas culinarias; mentres que outros establecementos contarán con descontos do 10% na súa carta. Unha proposta dirixida a aqueles clientes que acrediten ter visitado a referida exposición presentando o seu tícket de entrada.
Ademais, Begoña Franco sinalou que non descarta establecer contacto co resto de concellos que conforman Arousa Norte para propoñer a organización dalgunha outra exposición que contribúa a “dar a coñecer ao gran público esta marabilla de flor que é a camelia Sasanqua, que xusto florece en outono.”
Pola súa parte, o tenente de alcalde, José Luíz Ruiz, expresou que están “encantados” con esta convocatoria e aproveitou a ocasión para agradecer o labor de Ana Calo e Begoña Franco, así como para convidar á veciñanza da contorna a asistir a este evento.
