A Asociación Boirense de Empresarios (ABE) deu a coñecer os gañadores dos terceiros Premios ABE á Excelencia Empresarial, que foron elixidos grazas aos votos dos membros da entidade e que serán entregados este xoves 12 de decembro no salón de actos da sede da asociación, a partir das 20.30 horas (nun acto no que tamén está previsto celebrar o Accésit ao Premio Nacional de Comercio 2019). O Premio Mellor Comercio do Ano 2019 irá dar a Supermercado Claudio – A Tenda de Pepa. Pola súa banda, o Premio á Mellor Empresa do Ano 2019 recaerá en Studio Moai. A ABE lembra que, en total, recibíronse 327 votos válidos.
Os votos dos tres primeiros de cada categoría foron os seguintes:
– Mellor Comercio: Supermercado Claudio A Tenda de Pepa (19), The Desire Shop (14) e Cetarea Angel Mar (12).
– Mellor empresa; Studio Moai (22), Ginlab (12) e Restaurante Moanin (12).
Supermercado Claudio – A Tenda de Pepa
En setembro de 1970 abría súas portas A Tenda de Pepa como lugar de abastecemento e á vez de encontro social dos seus veciños. O establecemento, segundo informou a ABE, é un exemplo de “adaptación aos novos tempos”, ampliando e actualizando as instalacións e servizos pero mantendo “esa esencia e filosofía de tenda de barrio, de lugar de encontro e de atención personalizada”. Este ano celebrouse o 15 aniversario da andaina conxunta coa cadea galega de alimentación Claudio.
Studio Moai
Studio Moai é un proxecto de Moisén Picón, arquitecto de interiores, e varios colaboradores que están en continua busca de novos retos profesionais. Segundo explica a ABE, o Studio Moai destaca polos importantes esforzos aplicados á comunicación cos clientes e, tamén, pola atención a “calquera pequeno detalle ou idea por pequena que poida parecer”. Humildade, talento, un bo equipo así como a satisfacción dos clientes son as bases da proposta.
