A Asociación Boirense de Empresarios (ABE) entregou este xoves 12 de decembro os galardóns dos seus terceiros Premios á Excelencia Empresarial. No acto, desenvolvido no salón de actos da sede da asociación en Boiro, concedéronse dous recoñecementos: o Premio Mellor Comercio do Ano 2019, que foi dar ao Supermercado Claudio – A Tenda de Pepa; o Premio á Mellor Empresa do Ano 2019, que recaeu en Studio Moai.
Na entrega de galardóns na sede da ABE, que se viu ateigada de xente para asistir á gala, o presidente da asociación Daniel García mostrou a súa satisfacción de participar nunha actividade que é fiel ao espírito da ABE dende a súa creación en 1988: o espírito de apoiar ás empresarias e empresarios e alentar e distinguir a excelencia local, a innovación e o traballo ben feito.
Finalizadas as presentacións o presidente fixo unha paréntese para pór en valor o recente Accésit acadado pola ABE nos Premios Nacionais de Comercio 2019.
No transcurso da cita de onte, na que tamén participou o alcalde Boiro, José Ramón Romero, proxectouse o vídeo que a ABE vai levar a Madrid para a entrega do devandito galardón (o accésit) e onde se amosa unha pequena mostra do traballo que vén realizando a entidade empresarial boirense.
Chegadas as 21:00 horas comezou finalmente a entrega dos premios coa parte mais institucional do acto, na que o presidente lembrou os porqués destes galardóns, que naceron, dixo, “co obxectivo de premiar o labor daquelas empresas asociadas que co seu esforzo e dedicación contribúen día a día a crear riqueza e xerar emprego na nosa terra”.
O premio á Tenda de Pepa recolleuno Miguel Triñanes, xerente do negocio (entregouno Javier Caamaño, vicepresidente da ABE). O premio a Studio Moai, pola súa banda, recolleuno Moisés Picón, xente da devandita empresa.
Supermercado Claudio – A Tenda de Pepa
En setembro de 1970 abría súas portas A Tenda de Pepa como lugar de abastecemento e á vez de encontro social dos seus veciños. O establecemento, segundo informou a ABE, é un exemplo de “adaptación aos novos tempos”, ampliando e actualizando as instalacións e servizos pero mantendo “esa esencia e filosofía de tenda de barrio, de lugar de encontro e de atención personalizada”. Este ano celebrouse o 15 aniversario da andaina conxunta coa cadea galega de alimentación Claudio.
Studio Moai
Studio Moai é un proxecto de Moisés Picón, arquitecto de interiores, e varios colaboradores que están en continua busca de novos retos profesionais. Segundo explica a ABE, o Studio Moai destaca polos importantes esforzos aplicados á comunicación cos clientes e, tamén, pola atención a “calquera pequeno detalle ou idea por pequena que poida parecer”. Humildade, talento, un bo equipo así como a satisfacción dos clientes son as bases da proposta.
