Volta e Dálle chega este venres a Rianxo con Falar por Falar

22 Novembro 2019

A compañía Volta e Dálle Teatro, contra temporais e chuvieiras mil, recala este venres en Rianxo para representar a súa obra Falar por Falar, un espectáculo sobre a nosa lingua, no sentido máis galego do termo, e, tamén, sobre iso que levamos facendo dende hai unha chea de séculos e que consiste en abrir a boca e comunicarnos (ou tentar facelo) con palabras e frases. A representación, prevista para este venres 22 as 21.00 horas na sala Arcos Moldes, contará cos actores Carlos Santiago e Pepe Penabade. A cita teatral, destinada a un público adulto, ten entrada de balde até completar a sala a súa capacidade. Trátase dunha proposta da Rede Cultural da Deputación da Coruña.

A nivel argumental, a peza xúntanos con dous personaxes: un actor nado no medio rural, por unha banda, e un dramaturgo procedente dun medio urbano, pola outra. Os seus choques culturais e lingüísticos confrontan en clave retranqueira as súas vivencias e reflexións persoais arredor da lingua galega. Pepe Penabade e Carlos Santiago desafíannos a “unha viaxe pola realidade viva da lingua, á procura dunha visión liberada de prexuízos e idealizacións, que nos permita desentrañar un chisco os enigmas dese falar por falar que vén sendo toda lingua”.

Outros artigos

Publicidade

Revista en papel

Opinión