Esta mañá desenvolveuse a terceira xornada do xuízo polo crime de Diana Quer, centrándose na reconstrución dos últimos pasos da moza e das particularidades daquela madrugada do 22 de agosto de 2016.
Así, prestaron declaración as testemuñas sobre os momentos previos a que José Enrique Abuín abordase a Diana Quer, así como as circunstancias do día e do lugar dos feitos.
Unha amiga que estivo con Diana ata que se despediu coa intención de marchar para a casa relatou por videoconferencia que “no momento de despedirnos, estabamos as dúas falando cun mozo, e ela dixo que estaba quedando sen batería, que estaba cansa e que ía para a casa. Que xa mañá nos veríamos. Deixei de vela nos límites do parque.”
Tamén por videoconferencia interveu un amigo de Diana, a última persoa coa que intercambiou mensaxes antes de desaparecer. O mozo asegurou que, mentres se escribían, “noteina con medo, pero un nunca se imaxina esa situación.”
Dous meses despois, apareceu o teléfono móbil de Diana nunha zona próxima ao porto de Taragoña, no municipio de Rianxo, baixo a ponte da autovía do Barbanza. Por esta razón, declarou o mariscador que o atopou, manifestando que “recordo que a pantalla paréceme que estaba como laminada de levar un golpe. Estaba rota. E creo que, na parte superior, de fronte, non sei se era no lado dereito, tiña como un golpe ou estaba medio aberto.”
Ademais, compareceron os feirantes que tiñan estacionados vehículos no lugar onde o Chicle afirma que foi roubar gasóleo e nas inmediacións onde supostamente abordou a Diana, segundo el mesmo escenificou durante a reconstrución dos feitos. Os feirantes expuxeron que non escoitaron nada e que tampouco lles faltou gasóleo.
O xuízo continúa mañá, venres 15.
