Por cuarto ano, o Concello de Ribeira impulsa a través da súa área de Cultura un Concurso de Debuxo e Pintura para Escolares. A obra gañadora ilustrará o cartel de Nadal, ao igual que fixeron as alumnas Daniela Pena (do colexio Galaxia), Rosa Sanlés (do centro de Amicos) e Iria Paz (do colexio A Milagrosa de Oleiros) nas súas tres primeiras edicións.
Nas bases da convocatoria figura que poderán participar tódolos nenos e nenas de infantil e primaria dos centros escolares do Concello de Ribeira; ademais de que o tema deberá estar relacionado co Nadal. Tamén se especifica que a obra deberá entregarse sen texto de ningún tipo, presentándose en cartolina ríxida ou material semellante cun tamaño que non poderá superar o A3 e a técnica é libre. As propostas deben ser inéditas, polo tanto non poden ser obxecto de ningún outro premio, nin ser publicadas ou presentadas noutros concursos. Cada traballo asinarase con pseudónimo, o mesmo que aparecerá no exterior dun sobre pechado xunto coa idade, contendo no seu interior o nome da nena ou do neno, idade, curso e centro de ensino. Neste senso, o sobre presentarase pegado pola parte posterior do traballo.
Os participantes dispoñen ata o 20 de novembro para remitir as súas obras ao Cultural Lustres Rivas e o xurado estará composto por tres persoas vinculadas ás artes, así como pola concelleira de Cultura e Educación ou a persoa en quen delegue.
A decisión do xurado será inapelable e poñerase en coñecemento do centro de ensino da nena ou neno galardoado o 26 de novembro, e en acto público ao longo do mes de decembro.
O premio, único, consistirá nun diploma, un lote de libros, un agasallo sorpresa, e a edición da obra gañadora como motivo dos carteis de Nadal do Concello de Ribeira. Así mesmo, os centros de ensino participantes recibirán un obsequio literario para a súa biblioteca escolar.
