O alcalde de Ribeira, Manuel Ruiz, e representantes de sete organizacións de carácter social que operan no municipio rubricaron esta mañá os convenios de colaboración polos que a administración local subvenciona distintos programas e iniciativas promovidos por estes colectivos para traballar contra a exclusión e a prol da integración no concello ribeirense.
As sete entidades foron A Creba, AMBAR, Amicos, Amigos de Galicia, Cáritas, Faibén, e Renacer, e o importe global das axudas ascende a 32.000 euros. Os programas ou iniciativas apoiadas a través destas achegas son o programa de transporte de usuarios, en A Creba; o programa Vivindo na comunidade, en AMBAR; o servizo de atención psicopedagóxica, en Amicos; a cobertura de necesidades básicas, en Cáritas; a loita contra a pobreza e a exclusión, en Amigos de Galicia; o proxecto Contigo, en Faibén; e o programa de prevención no eido das drogodependencias, en Renacer.
O rexedor salientou a intención de seguir incrementando a contía destas axudas e loou o papel de todas estas entidades coa fin de erradicar factores que conduzan a situacións de exclusión social e mellorar a calidade de vida de persoas especialmente vulnerables.
No acto tamén estivo presente a concelleira de Servizos Sociais, Ana Ruiz.