Na sesión de hoxe proxectouse o vídeo da reconstrución de José Enrique Abuín do crime de Diana Quer, segundo a versión dos feitos do acusado. Asegura que a noite do asasinato estaba roubando gasóleo dos camións dos feirantes da rúa Venecia, cando apareceu a moza madrileña e que, ao verse descuberto, agarrouna polo pescozo e matouna.
A continuación, sempre segundo a versión de Abuín, introduciu o corpo na parte traseira do vehículo para dirixirse á nave de Asados. Ademais, detalla como levantou a arqueta do pozo onde posteriormente depositou o corpo de Diana. Do mesmo xeito reproduce como lastrou o corpo da súa vítima.
Os axentes que lle seguiron os pasos ao procesado cren que mente e manifestan que, aínda que o acusado non confesara, atoparían o corpo da moza, xa que “cometeu un erro grave que foi ensinarlle a unha persoa o lugar a onde trasladou a Diana e incluso o pozo onde a arroxou.”
Tamén se apuntou que “baixar por esa escaleira sen luz é practicamente imposible”, en relación á que se atopa na nave de Asados e que conduce ao soto do pozo no que permaneceu Diana case 500 días.
Así mesmo, os axentes que se ocuparon da inspección ocular do vehículo do único procesado contaron que localizaron unha brida e un rolo de cinta, así como unha saba no maleteiro, que foi limpado.
