A mestura de comedia e teatro chega o domingo 1, ás 19.00 horas, ao Elma da man de Pedro Brandariz, Fran Rei e Isabel Risco, de Culturactiva, con Papar sen cancelas. Trátase dun delicioso espectáculo onde o público terá a ocasión de deleitarse cunha exquisita selección gourmet dos mellores pratos da nosa lingua. Os asistentes poderán presenciar as artes para a cociña cómica de tres chefs preparando o menú para personaxes entre o máis distinguido do panorama galego actual.
A entrada é libre e ata completar aforo. Esta actividade enmárcase no bloque destinado a maiores de 16 anos da programación teatral organizada pola Concellería de Cultura da Pobra do Caramiñal en colaboración coa Rede Cultural da Deputación da Coruña.
