A Pobra do Caramiñal segue sumando actividades culturais ao seu calendario. Nesta ocasión, a programación focalízase no teatro, subíndose ás táboas do Elma numerosas compañías encargadas de achegar esta rama das artes escénicas a través das súas diversas obras. Ademais, as pezas teatrais clasifícanse en dous grandes bloques: para maiores de 16 anos e para público infantil e familiar. Así o deron a coñecer esta mañá a concelleira de Cultura, Patricia Lojo, e a técnica da mesma área, Fita Sanisidro.
A edil Patricia Lojo destacou que “o teatro é unha expresión corporal, onde fai que se cre unha simbiose especial entre o actor e o espectador. A través del, se traballan moitísimos sentimentos e se crea un ambiente onde se tratan temas moi importantes, quizás a través do humor, pero sempre cunhas mensaxes profundas para a vida dos cativos e dos maiores.”
Na súa intervención, a técnica de Cultura manifestou que para o público familiar e infantil “temos unha mestura tanto de teatro como de xogo con música, maxia e humor; ou ben títeres para os máis pequenos.”
O bloque da programación destinada a maiores de 16 anos arranca o domingo 10, ás 19.00 horas, con A compañeira de piso, de Contraproducións, a cal trata os temas da idade, a muller e a identidade dun xeito fresco e divertido. Unha comedia negra sobre a capacidade de reconducir o tren da propia vida e o que sucede cando este descarrila.
Continúa o domingo 17, ás 19.00 horas, da man de Fulano, Mengano e Citano con A louca historia de Galicia, levando aos espectadores por tódolos períodos de luz e de sombras, ata, ás veces, de apagón total, que fixeron dos galegos o que somos.
Pedro Brandariz, Fran Rei e Isabel Risco, de Culturactiva, presentan Papar sen cancelas ás 19.00 horas do domingo, 1 de decembro. Un delicioso espectáculo onde o público terá a ocasión de deleitarse cunha exquisita selección gourmet dos mellores pratos da nosa lingua.
Afiando con humor recala da man de Sergio Pazos o domingo, 8 de decembro, ás 19.00 horas. Trátase dun espectáculo de narración oral baseado nos afiadores, onde se pretende dignificar, recuperar e falar da súa vida.
Finalmente, Quico Cadaval, Celso Sanmartín e José Luis Gutiérrez achegan Tres vellas (polo menos) o domingo, 15 de decembro, ás 19.00 horas. No repertorio dos tres hai moitos contos que foron relatados por vellas, a quen llos narraron outras.
Por outra banda, terán lugar as pezas teatrais dirixidas a un público infantil e familiar, as cales se adscriben ao Nadal Cultural. Teatro Ghazafelhos representa Rubicundo o xoves, 26 de decembro, ás 18.30 horas. Unha historia sobre a amizade, a constancia e a poesía, abrindo a posibilidade de perseguir os soños sen sentir fronteiras.
O venres, 27 de decembro, ás 18.30 horas, Culturactiva presenta a Félix Rodríguez e Fran Rei en Saaabor! Trátase dun espectáculo cómico que mestura música, maxia, humor, ritmo e participación do público, co mundo da gastronomía de fondo.
Por último, A toupiña que quería saber quen lle fixera aquilo na cabeza recala da man de Xanela do Maxín ás 18.30 horas do luns, 30 de decembro. Deste xeito, acompañarase a este mamífero na súa investigación pola granxa co obxectivo de coñecer que animal dos que viven alí lle fixo semellante agravio.
A entrada a todas as citas é libre e ata completar aforo. As actividades están organizadas pola Concellería de Cultura da Pobra do Caramiñal en colaboración coa Rede Cultural da Deputación da Coruña.
